Aldi сүлжээ дэлгүүр Их Британи улсын Лондон хотноо тооцооны кассгүй салбараа нээжээ.
Тодруулбал тухайн салбараар үйлчлүүлэх хүмүүс дэлгүүрт орж, хүссэн бараагаа худалдан аваад гарахад л хангалттай юм. Харин тооцоо хэрхэн бодогдох тухай лавлахад, дэлгүүрийн камержуулалтын систем үйлчлүүлэгчийн авсан барааг бүртгэж, Aldi Shop&Go аппликэйшн дахь бүртгэлтэй хаяг руу нь тооцоог илгээх ажээ. Тус салбар нь одоогоор туршилтын хугацаанд үйл ажиллагаагаа явуулж байгаа юм.
Харин тухайн салбарт үйлчлүүлэгч архи, согтууруулах ундаа худалдан авах болбоос аппликэйшний нүүр царайгаар нас тодорхойлох технологийн тусламжтайгаар насаа тогтоолгон худалдан авах ажээ. Хэрэв үйлчлүүлэгч насанд хүрсэн ч аппликэйшн алдаатай ажиллаж байвал дэлгүүрийн үйлчилгээний ажилтанд хандахад л болох гэнэ.
Aldi сүлжээ дэлгүүр нь Их Британи улсад үйл ажиллагаа явуулдаг тав дахь томоохон сүлжээ юм.
Эх сурвалж: BBC