Дэлхийн Эрүүл Мэндийн Байгууллагын тэргүүн Тедрос Адханом Гебриесус дэлхийн удирдагч нарт хандаж, “Коронавирусийн цар тахал дуусах битгий хэл, дуусахад ойртоо ч үгүй байна” хэмээжээ.
Түүний анхааруулснаар, омикрон хувилбарыг бусад хувилбараас хамаагүй хөнгөн гэж үзэж, вирусийн аюулыг гүйцэд танихгүй байгаа нь өөрөө нэг эрсдэл гэнэ.
ДЭМБ-ын тэргүүн ингэж анхааруулах болсон нь ойрын өдрүүдэд Европын холбооны улсуудад коронавирусийн тоо эрс нэмэгдэж байгаатай холбоотой юм. Улмаар Франц улсад өчигдөр буюу мягмар гарагт л гэхэд 24 цагийн дотор хагас сая шинэ тохиолдол бүртгэгдсэн бол Дани улсад 33,493 тохиолдол, Итали улсад 228,179 тохиолдол тус тус бүртгэгдсэн юм. Тийнхүү өнгөрсөн долоо хоногт дэлхий даяар омикрон хувилбарын 18 сая тохиолдол бүртгэгджээ.
Түүнчлэн Доктор Тедросын анхааруулж байгаагаар, “Дэлхий дахинаа омикрон хувилбарын тархалт эрчимтэй өсөж байгаагаас үүдэн шинэ хувилбарууд гарах эрсдэл ч өндөр байгаа учир хавьтлыг илрүүлэх, эрсдэлийн үнэлгээ хийх ажлууд нь одоо ч чухал үүрэгтэй байна” гэсэн юм.
Эх сурвалж: BBC