Молдав улсын ерөнхий сайд Наталия Гаврилита мягмар гарагт сэтгүүлчдэд өгсөн яриандаа, Газпромын зүгээс Молдав улсын нэгдүгээр сард худалдан авсан байгалийн хийн төлбөр барагдуулах хугацааг хойшлуулахгүй болбоос онц байдал зарлана гэсэн байна.
Түүний хэлснээр, “Бид энэ сард худалдан авсан байгалийн хийн төлбөрөө барагдуулах хугацааг хойшлуулах тухайд Газпромтой хэлэлцэж байгаа. Цаашид Газпромоос ирэх хариунаас шалтгаалан эдийн засгийн хүрээнд онц байдал зарлах эсэх асуудал яригдана.
Молдав улсын засгийн газраас НӨАТ-ыг Молдавгазад эргүүлэн өгөх аргыг ч судалж байгаа” хэмээсэн юм.
Улмаар Молдавгазын тэргүүн Вадим Чебанийн хэлснээр, тэд энэ сард байгалийн хийн төлбөрөө бие даан төлж чадахгүй бөгөөд байгалийн хийн нийлүүлэлтэд саатал үүсэж болзошгүй гэсэн байна. Басхүү түүний мэдээлж байгаагаар, Молдваын банкнууд ч тэдэнд зээл олгохгүй ажээ. Учир нь Молдавгаз Газпромд их хэмжээний өрийн түүхтэй юм.
Молдавгазын хувьд энэ долоо хоногийн дотор Газпромд арван-хоёрдугаар сард худалдан авсан байгалийн хийн тооцоог төлж барагдуулах бөгөөд нэгдүгээр сард худалдан авсан байгалийн хийн төлбөрийг төлөхөд даруй 25 сая евро дутаж байгаа гэнэ.
Эх сурвалж: ТАСС