Мягмар гарагт Сингапур улс дахь крипто АТМ-ын хамгийн том оператор болох Daenerys & Co компани бүх автомат машинаа унтраах болжээ.
Учир нь Сингапур улсын Мөнгөний бодлогын газраас криптовалютыг олон нийтэд сурталчлахгүй байх үүднээс тэдгээр машины үйл ажиллагааг хориглохоор журамласан байна. Улмаар Daenerys & Co компанийн зүгээс мягмар гарагийн орой гэхэд бүх автомат машинаа унтрааж, татан буулгажээ.
Олон улсын хувьд энэ мэтээр криптовалют сурталчилгааны эсрэг арга хэмжээ авах болсон ч Сингапур улсын Мөнгөний бодлогын газраас гаргасан дээрх шийдвэр илүү гайхаш төрүүлж байгаа юм. Яагаад гэвэл өнгөрөгч арван-хоёрдугаар сард л гэхэд тус улс криптовалютад ээлтэй байдлаараа дэлхийд нэгдүгээрт бичигдэж байжээ.
Харин тус улсын Мөнгөний бодлогын газраас тайлбарлаж байгаагаар, тэд энэ төрлийн автомат машинууд нь ард иргэдийг эрсдэлээ тооцолгүйгээр бодлогогүй хөрөнгө оруулалт хийх хөшүүрэг болж байна гэж үзсэний дүнд энэхүү шийдвэрийг гаргасан байна.
Эх сурвалж: Fortune