БНХАУ-ын Худалдааны яамнаас мэдээлснээр, ШХАБ-ын гишүүн орнуудын оролцон зохион байгуулсан онлайн үзэсгэлэн худалдаа нийт 100 сая юань буюу 16 сая орчим ам.долларын ашигтай ажиллажээ.

Энэ сарын 10-ны өдөр нээлтээ хийсэн тус үзэсгэлэн худалдааны үеэр 1800 орчим шууд дамжуулалт бүхий бараа бүтээгдэхүүний танилцуулга цацагдаж, 4 сая гаруй үзэгчид цахимаар оролцсон байна.

Тийнхүү нийт 1500 орчим нэр төрлийн бараа бүтээгдэхүүн үзэсгэлэнгийн үеэр худалдаалагдаж, ШХАБ-ын 14 гишүүн орон оролцож, шинэ жилийн баярыг хэрхэн тэмдэглэдэг болохоо хятад үзэгчидтэй хуваалцжээ.

Үзэсгэлэн худалдааны гол зорилго нь Хятад-ШХАБ-ын хоорондын худалдааг ойрын 5 жилд 2.3 их наяд ам.долларт хүргэх төлөвлөгөөний нэг хэсэг байсан бөгөөд ШХАБ-ын гишүүн орнуудын бараа бүтээгдэхүүнийг хятад хэрэглэгч нарт таниулах, сурталчлах байсан юм.

Түүнчлэн өнгөрсөн онд л гэхэд Хятад-ШХАБ-ын хооронд хийгдсэн худалдаа түүхэнд байгаагүй дээд хэмжээнд хүрч, даруй 40 хувийн өсөлт үзүүлсэн нь үнэхээр тэмдэглүүштэй хэрэг болохыг ч Худалдааны яамны хэвлэлийн төлөөлөгч цохон тэмдэглэсэн байна.

Эх сурвалж: Xinhua