АНУ-ын цахилгаан автомашин үйлдвэрлэгч Тесла компани бүрэн автомат жолоодлогын бета хувилбар суурилуулсан 54,000 орчим автомашинаа АНУ-ын зах зээлээс эргүүлэн татахаар болсон тухай Ройтерс болон Ассошиэйтед Пресс агентлагууд мэдээлэв.
Тус мэдээнд дурдаснаар, эдгээр тээврийн хэрэгслүүдийн бүрэн автомат жолоодлогын программ хангамж нь зогсох тэмдэг дээр бүрэн зогсолгүй, бага зэрэг хурдаа сааруулан цааш үргэлжлүүлэн хөдөлгөөнд оролцож байгаа нь аюул учруулж болзошгүй хэмээн уг шийдвэрийг гаргасан гэжээ.
АНУ-ын Үндэсний Замын хөдөлгөөний аюулгүй байдлын албаны мэдээлснээр тус шийдвэрийн хүрээнд 2016-2022 оны хооронд зарагдсан Model S болон X, 2017-2022 оны Model 3, 2020-2022 онд борлуулагдсан Model Y загваруудыг эргүүлэн татахаар болсон байна.
Тесла компанийн зүгээс уг алдаагаа засахын тулд програм хангамжийг шинэчлэнэ гэдгээ мэдэгдэв.
Эх сурвалж: YTN