Цар тахлын дэгдэлт эрчимтэй тархсаар байгаа энэ үед Туркийн эмнэлгийн ажилтнууд ажиллах нөхцлийг сайжруулах, цалингаа нэмэгдүүлэхийг шаардан ажил хаялт зарласан байна.
Туркийн Анадолу мэдээллийн агентлагийн мэдээлснээр Туркийн эрүүл мэндийн нийгэмлэгээр тогтохгүй Эрүүл мэндийн салбарын үйлдвэрчний эвлэлийн олон мянган гишүүд нэгдэн нийслэл Анкара болон Истанбул хотод нэг өдрийн ажил хаялт зарлажээ.
Тэд цалин хөлсийг нэмэгдүүлэх, ажлын цагийг богиносгох, эмнэлгийн ажилтнуудын эсрэг хэл ам, бие махбодийн хүчирхийллийг арилгах, цар тахлын дэгдэлттэй энэ үед халдвараас урьдчилан сэргийлэхэд шаардагдах нөхцлийг бүрдүүлэхийг засгийн газраас хүссэн байна.
Туркийн анагаах ухааны нийгэмлэгийн доктор Али Хайдар Темел “Бид хүн шиг амьдрахын тулд ядаж л хангалттай орлоготой байхыг хүсч байна. Одоо авч буй цалингаараа амь зуух үнэхээр хэцүү байна” хэмээн үзэл бодлоо илэрхийлжээ.
Туркийн эрүүл мэнд, эмнэлгийн ажилчдын дундаж орлого хөдөлмөрийн хөлсний доод хэмжээнээс арай дээгүүр байдаг аж.
Сөрөг хүчин болох Сайн намын зүгээс мэдэгдэхдээ “Сүүлийн хоёр жилийн хугацаанд 3000 орчим эмч Туркийг орхин гарсан. Хэрэв эмнэлгийн ажилтнуудын ажиллах нөхцлийг сайжруулахгүй бол энэ салбарын бүх чадалтай боловсон хүчнээ алдахад хүрээд байна” хэмээн цохон тэмдэглэжээ.
Эх сурвалж: SBS