Казахстаны ерөнхийлөгч Касим-Жомарт Токаев ОХУ-ын ерөнхийлөгч Владимир Путинтэй уулзаж, хоёр орны цаг үеийн асуудлаар ярилцаж, иж бүрэн хамтран ажиллахаа амлалаа гэж Казань форум орон нутгийн цагаар 11-ний өдөр мэдээлэв.

Казахстаны ерөнхийлөгчийн ордны хэвлэлийн албанаас мэдээлснээр, ерөнхийлөгч Токаев 10-ны өдөр Орост төрийн айлчлал хийн ерөнхийлөгч Путинтэй дээд хэмжээний уулзалт хийсэн ба боловсрол, зам тээвэр, цахимжуулах, сансар, цөмийн мэргэжилтнүүдийг бэлтгэх зэрэг салбарт хамтран ажиллах баримт бичигт гарын үсэг зурсан байна.

Дээд хэмжээний уулзалтын дараа хамтарсан мэдэгдэл хийх үеэр Путин хэлэхдээ "өнгөрөгч нэгдүгээр сард Казахстан улсын аюулгүй байдалд дотоодын болон гадны улсуудын нөлөөлтэй босогчид урьд өмнө хэзээ ч байгаагүй аюул заналхийллийг учруулсан билээ. Уг эмгэнэлт үйл явдлын дараа Казахстаныг хэвийн болгохоор хичээж буй Ерөнхийлөгч Токаевын хүчин чармайлтыг бид бүх талаар дэмжих болно” хэмээн онцлов.

Ерөнхийлөгч Токаев “Өнгөрсөн онд хоёр орны хоёр талын худалдааны хэмжээ 21 тэрбум ам.долларыг давсан. Өдгөө дипломат харилцаа тогтоосны 30 жилийн ой тохиож буй манай 2 орны харилцаа бүх салбарт амжилттай хөгжиж, стратегийн найдвартай холбоотон болж байна” хэмээн цохон тэмдэглэжээ.

Тэрээр цааш үргэлжлүүлэн “Оросын компаниуд Казахстанд 17 тэрбум гаруй ам.долларын хөрөнгө оруулалт хийсэн ба эдүгээ 1.5 тэрбум ам.долларын өртөг бүхий 11 нэмэлт төслийг боловсруулж байна" хэмээн дурдсан байна.

Казахстан улсад өрнөсөн эсэргүүцлийн жагсаалын дараа анх удаа уулзсан хоёр удирдагчид урт ширээний ард бие биенээсээ хол зайдуу суухын оронд хуучин ЗХУ-ын уламжлал ёсоор дотночлон гар барьж, тэврэлдэн мэндчилсэн байна.

Эх сурвалж: Yonhap