Испанийн Барселона хотод удахгүй зохион байгуулагдах дэлхийн хамгийн том гар утасны үзэсгэлэн болох “Mobile World Congress”-д Оросын павильоныг байгуулахгүй гэдгээ онцолжээ.
Тус үзэсгэлэнг зохион байгуулж буй Дэлхийн үүрэн холбооны операторуудын холбооны зүгээс орон нутгийн цагаар 25-ны өдөр "Украины нутаг дэвсгэрт түрэмгийлсэн Оросыг хатуу зэмлэн буруушааж байна" хэмээн мэдэгдсэн талаар Ассошиэйтед Пресс болон Ройтерс агентлагууд мэдээлэв.
Дэлхийн үүрэн холбооны операторуудын холбоо өнөөдөр хийсэн мэдэгдэлдээ, "Одоогийн нөхцөл байдал хийгээд олон хүний амь нас харамсалтайгаар хохирч байгааг харсаар буй энэ үед бидний зохион байгуулж буй энэ үйл ажиллагаа тийм ч чухал биш юм шиг санагдаж байна. Манай холбооны зүгээс бүх хориг арга хэмжээ, засгийн газрын бодлогыг дагаж мөрдөх болно” хэмээн цохон тэмдэглэсэн байна.
Тус үзэсгэлэнд Оросын 10-аад компани оролцохоор мэдүүлгээ өгсөн ба тэдгээр нь оролцох боломжтой хэвээр байгаа ч зохион байгуулагчид Оросын компаниудыг танилцуулах зорилгоор тусгайлан павильон байгуулахааргүй болсон аж.
2-р сарын 28-аас 3-р сарын 3-ны хооронд Барселона хотод зохион байгуулагдах “Mobile World Congress” үзэсгэлэнд дэлхийн 150 орны 1500 компани оролцож, ойролцоогоор 50,000 орчим зочид үзэж сонирхох болно гэсэн таамгийг дэвшүүлжээ.
Эх сурвалж: SBS