БНХАУ-ын Үйлдвэрлэл, мэдээллийн технологийн яамнаас даваа гарагт мэдээлснээр Хятад улс үйлдвэрлэлийн салбараараа 12 жил дараалан дэлхийг тэргүүлж байгаа ажээ.
Улмаар тус яамны сайд Шиао Я Чин хэвлэлийн бага хурлын үеэр мэдэгдсэнээр, 2021 онд үйлдвэрлэлийн салбарын орлого 31.4 их наяд юаньд хүрсэн бөгөөд энэ нь 2020 оны орлоготой харьцуулахад даруй 9.8 хувиар өссөн үзүүлэлт гэнэ.
Үүнээс өндөр технологийн үйлдвэрлэл даруй 18.2 хувийн өсөлт үзүүлсэн бол тоног төхөөрөмж үйлдвэрлэл 12.9 хувийн өсөлт үзүүлсэн байна. Тийнхүү 2021 оны ДНБ-ын 27.4 хувийг үйлдвэрлэлийн салбар дангаар бүрдүүлжээ.
Шиао Я Чиний мэдээлснээр, тус яам цаашид ч аж үйлдвэрийн салбарт хөрөнгө оруулалтыг идэвхжүүлж, үйлдвэрлэлийн технологио сайжруулах, 5G үйлчилгээ, гигабит шилэн кабелын сүлжээг бий болгох ажлыг хурдасгахад чиглэн ажиллах бөгөөд тэргүүлэгчийн байр сууриа хадгалж үлдэхийг зорих гэнэ.
Эх сурвалж: Xinhua