ОХУ-ын Украин дахь түрэмгийлэл үргэлжилж байгаа энэ үед АНУ болон Олон улсын эрчим хүчний агентлагийн (ОУЭА) бусад гишүүн орнууд 60 сая баррель газрын тос яаралтай гаргахаар шийджээ.

CNN суваг болон Цагаан ордны мэдээлснээр, ОУЭА-ийн гишүүн 31 орон орон нутгийн цагаар 1-ний өдөр зохион байгуулагдсан цахим хурлын үеэр дээрх шийдвэрийг гаргасан байна. Яаралтай гаргах энэхүү 60 сая баррель нефтийн тал нь АНУ-ын стратегийн нөөцөөс, нөгөө тал нь Европ, Азийн холбоотнуудаас бүрдэх аж. Тодруулбал, Солонгос, Герман, Их Британи, Итали, Нидерланд, Япон зэрэг орнууд багтах юм.

Цагаан ордны хэвлэлийн төлөөлөгч Жен Псаки уг шийдвэрийн талаар мэдэгдэл хийхдээ "ОХУ-ын ерөнхийлөгч Владимир Путины цэргийн үйл ажиллагаа дэлхийн эрчим хүчний хангамжийг тасалдуулахаас сэргийлэх зорилгоор бид боломжтой бүх арга хэрэгслийг ашиглахад бэлэн байна. ОХУ-ын үндэслэлгүй түрэмгийллийг олон улс буруушааж, Путины сонгосон дайны үр дагаврыг шийдвэрлэхийн тулд дэлхийн өнцөг булан бүрт байгаа холбоотнуудтайгаа хамтран ажиллаж байгаагийн бас нэг жишээ юм” хэмээн цохон тэмдэглэжээ.

Гишүүн орнууд 2011 оноос хойш анх удаа газрын тосны нөөцөө яаралтай гаргахаар тохиролцсон нь энэ юм. 1974 онд Арабын нефтийн хоригийн үр дүнд уг систем байгуулагдсанаас хойш үүнтэй ижил шийдвэрийг дөрөв дэх удаагаа гаргаж буй нь энэ аж.

Эх сурвалж: Asiae