Лхагва гарагт Дэлхийн банкнаас олон нийтэд хандаж хийсэн мэдэгдэлдээ, Украин улсад үүсээд буй нөхцөл байдлын хүрээнд ОХУ, Беларусь улсуудад хэрэгжүүлж байсан бүх хөтөлбөрөө даруй зогсоох болсноо хэлжээ.

Тэдний мэдээлснээр, “Дэлхийн банк групп 2014 оноос хойш ОХУ-д ямар нэг шинэ зээл, хөрөнгө оруулалт хийхийг зөвшөөрөөгүй. Харин Беларусь улсын хувьд 2020 оны дундаас хойш шинэ зээлийн хүсэлтийг нь хүлээж авахгүй болсон.

Тэгвэл ОХУ Украин улсыг булаан эзлэхээр оролдож буй энэ үед манай байгууллага Орос, Беларусь улсуудад хэрэгжүүлж байсан хөтөлбөрүүдээ нэн даруй зогсоох боллоо” гэжээ.

Беларусь улсын хувьд Украин улсад өрнөж байгаа мөргөлдөөний хүрээнд ОХУ-ыг дэмжиж, цэрэг зэвсгээр тусалж байгаа тул зарим улсын зүгээс тавьж буй хоригтоо тус улсыг хамруулан тогтоох болсон юм.

Эх сурвалж: ТАСС