Испанийн хувцас загварын салбарын Inditex компани Украиныг эзлэн түрэмгийлсэн ОХУ дахь Zara брэндийн 502 дэлгүүрээ хааж, онлайн худалдаагаа зогсоох болсноо мэдэгдлээ.
Inditex компани мэдэгдэлдээ, "Одоогийн нөхцөл байдалд ОХУ-д үйл ажиллагаа явуулах нь бизнесийн орчны найдвартай байдлыг баталгаажуулж чадахгүй хэмээн үзэж бизнесээ түр хугацаагаар зогсоож байна" хэмээн онцолсныг Ройтерс агентлаг орон нутгийн цагаар 5-ны өдөр мэдээлжээ.
Тус компанийн мэдээлснээр Орос дахь борлуулалт нь олон улсын бизнесийн үйл ажиллагааны ашгийн (EBIT) 8.5 орчим хувийг эзэлдэг аж.
Inditex-ээс гадна өөр олон дэлхийн хэмжээний салбар салбарын томоохон компаниуд Орос дахь бизнесийн үйл ажиллагаагаа зогсоох шийдвэрийг ээлж дараалан гаргасаар байгаа билээ. Тухайлбал өнгөрөгч 3-ны өдөр Nike компани Орос дахь бүх дэлгүүрээ түр хаах болсноо зарласан бол дэлхийн хамгийн том тавилга үйлдвэрлэгч Ikea мөн ьус улс дахь бүхий л дэлгүүрээ хааж байгаагаа мэдэгдсэнээс гадна Орос, Беларусь улсаас түүхий эд, бараа бүтээгдэхүүн худалдан авахаа зогсоох болсноо цохон тэмдэглэсэн юм.
Түүнчлэн Шведийн хувцас загварын салбарын H&M компани Орос дахь борлуулалтаа одоогоор бүрэн зогсоогоод байгаа бол Apple, Netflix, Walt Disney, Intel, Ford, Boeing, General Motors зэрэг томоохон компаниуд ч мөн тус улс дахь бизнесийн үйл ажиллагаагаа түр хугацаагаар зогсоож буйгаа мэдэгдээд байгаа билээ.
Эх сурвалж: JoongAng