Кремлийн өндөр албан тушаалтны мэдэгдсэнээр, Украины булаан эзлэлтийн хариуд барууныхан тэдний эсрэг хориг тавьсан ч Оросын газрын тос, байгалийн хийг худалдан авах орнууд хангалттай бий гэжээ.
ОХУ-ын Гадаад хэргийн сайд Сергей Лавровын пүрэв гарагт хэлснээр, тэд хэнийг ч өөрсдийнх нь газрын тос, байгалийн хийг ав гэж шахахгүй бөгөөд хэрэв хэрэглэгчид өөр түнштэй хамтарч, тэднээс газрын тос, байгалийн хийгээ авах болбол энэ нь нээлттэй асуудал, бидэнд хангалттай зах зээл байгаа хэмээсэн байна.
Түүний ингэж мэдэгдэх болсон шалтгаан нь Европ ОХУ-аас байгалийн хий татан авах хэмжээгээ бууруулах гэж хичээх болсонтой холбоотой гэнэ.
Улс орнуудын зүгээс ОХУ-ын эсрэг олон төрлийн хориг тавих болсноор энэ долоо хоногийн эхэн гэхэд дэлхий дахинаа газрын тосны үнэ 2008 оноос хойших хамгийн дээд үнэд хүрч, Европ тивд байгалийн хийн үнэ түүхэн дээд үнээр худалдаалагдах болсон юм. Үүний хүрээнд ерөнхийлөгч Владимир Путин, “Бид гол худалдан авагчдадаа нийлүүлэх ёстой бүх л бараагаа нийлүүлж байгаа. Харин үнэ өсөж байгаа нь бидний буруу биш” гэж мэдэгджээ.
Эх сурвалж: Al Jazeera