Украины ерөнхийлөгч Володимир Зеленський Швейцар улсын Nestlé компанийг ОХУ-д үйл ажиллагаагаа явуулсаар байгаад шүүмжилжээ.
Түүний хэлснээр, ““Сайн хүнс. Сайхан амьдрал” Энэ бол Nestlé-ийн уриа үг. Гэсэн ч танай компани ОХУ-ын зах зээлийг орхихоос татгалзаж байна. ОХУ-аас одоо ч зөвхөн манай улс гэлтгүй Европын орнуудад заналхийлэл ирж байгаа. Тэд бүр цөмийн зэвсгээр ч сүрдүүлж байна” хэмээж, Швейцар улсын ард иргэдэд хандсан байна.
Харин Nestlé-ийн зүгээс, “Бид ОХУ дахь үйл ажиллагаагаа эрс хумьж, гол бүтээгдэхүүнүүдээс бусад экспорт, импортоо ч зогсоосон. Бидний хувьд тус улсад хөрөнгө оруулалт хийхээ больсон бөгөөд бүтээгдэхүүний сурталчилгаа ч нийтлэхгүй байгаа. Одоо явуулж байгаа үйл ажиллагаанаас ч бид ашиг хүртэхгүй байгаа.
ОХУ-ын ард иргэдийг шаардлагатай хүнсээр хангаж байгаа нь бид үйл ажиллагаагаа урьдын адил явуулж байгаа гэсэн үг биш. Манай компани Украин улсад ч бараа бүтээгдэхүүнээ нийлүүлсээр байгаа” гэжээ.
Nestlé компанийн хувьд ОХУ-д 7000 гаруй ажилтантай үйл ажиллагаа явуулдаг юм.
Эх сурвалж: CNN