Америкийн Уолл Стрит Журнал сонин орон нутгийн цагаар 21-ний өдөр мэдээлснээр АНУ нь ОХУ-ын түрэмгийллийн эсрэг тэмцэж буй Украинд хуучин ЗХУ байх үед үйлдвэрлэж асан агаарын довтолгооноос хамгаалах зэвсгийн нууцаар нийлүүлж байгаа талаар онцлон нийтэлжээ.

ЗХУ-ын үед үйлдвэрлэж байсан уг зенитийн зэвсгийг анх тус улсын батлан ​​хамгаалах салбарын технологи, тэр дундаа ойрын тусгалын зенитийн пуужин болох SA-8 зэргийг судлах мөн цэргийн сургуулилтад ашиглах зорилгоор АНУ анх авч байжээ.

Украины зэвсэгт хүчний хувьд хуучин ЗХУ-ын зэвсгийн системийг сайтар мэддэг бөгөөд эдгээр нийлүүлж буй зэвсэг, технологийг үр дүнтэй ашиглана гэдэгт АНУ-ын зүгээс найдлага тавьж байгаа нь дамжиггүй.

Тус улсын Үндэсний аюулгүй байдлын зөвлөл болон Пентагон Украинд яг ямар төрлийн зэвсгийг нийлүүлсэн талаарх мэдээллийг тодруулахаас татгалзсан байна.

Пентагоны хэвлэлийн төлөөлөгч Жон Кирби “Украинчуудын аюулгүй байдал яг одоо юу юунаас илүү маш чухал байна. Пентагон нийлүүлсэн зэвсэг техникийнхээ талаар дэлгэрэнгүй мэдээлэл өгөхгүй” хэмээн цохон тэмдэглэжээ.

Жо Байдены засаг захиргаа өнгөрсөн сард Украинд нэг тэрбум ам.долларын цэргийн тусламж үзүүлэх төлөвлөгөөг танилцуулсан билээ. Гэвч ОХУ-ыг өдөөн турхирахгүйн үүднээс тусламжийн хамрах хүрээг тодруулахаас мөн татгалзсан юм.

1994 оноос АНУ нь хуучин ЗХУ-д үйлдвэрлэсэн пуужингийн системийг цуглуулж эхэлсэн талаар тус сонинд онцолсон байв. Тэдгээрийн зарим нь АНУ-ын зэвсгийн агуулахад хадгалаатай байгаа бол SA-8-ын хувьд хялбархан зөөж, ашиглах боломжтойгоороо тун давуу талтай аж.

Тус сонинд дурдаснаар АНУ-д алсын тусгалын агаарын довтолгооноос хамгаалах S-300 пуужин байгаа хэдий ч энэ удаад Украинд өгөхийг төдий л яараагүй байна.

Эх сурвалж: Fnnews