Францын TotalEnergies компани Японы эрчим хүчний Eneos Holdings групптэй хамтарч, Азийн зах зээлд нарны эрчим хүч нийлүүлэх болжээ. Түншүүд ирэх зургадугаар сарын сүүл гэхэд 50-50 хувь нийлүүлсэн хамтралын гэрээгээ байгуулах юм. Гэрээг байгуулсны дараагаар тус компанийн нэр, байршил зэрэг нь тодорхой болох ажээ.
Тэдний зүгээс хамтын ажиллагааны хүрээнд ирэх 5 жилийн хугацаанд нийт 2 гигаватт эрчим хүч үйлдвэрлэх хүчин чадал бүхий нарны зайн хураагуурыг Япон, Энэтхэг, Тайланд зэрэг 9 оронд байршуулах юм. Харин хураасан эрчим хүчийг орон нутгийн үйлдвэрүүд болоод арилжааны байгууллагуудад худалдаалах гэнэ.
Үйл явдлын хүрээнд TotalEnergies компанийн сэргээгдэх эрчим хүчний хэлтсийн тэргүүн дэд ерөнхийлөгч Винсент Стокуарт, “Энэхүү хамтын ажиллагааны хүрээнд манай компани цаашид бидний голлох зах зээл болох Ази тивд үйл ажиллагаагаа үргэлжлүүлж, хөгжүүлэх хүсэл зорилготой гэдгээ батлан харуулж байгаа юм” хэмээн мэдэгджээ.
Эх сурвалж: Nikkei Asia