Олон улсын валютын сангийн (ОУВС) тэргүүн Кристалина Георгиева Украины дайны нөлөө болон бусад хүчин зүйлсийн улмаас энэ он болон ирэх онд таамаглаж асан дэлхийн эдийн засгийн өсөлтийг бууруулах төлөвлөгөөтэй байгаагаа мэдэгдлээ.

Ройтерс болон бусад гадаадын хэвлэл мэдээллийн хэрэгслүүдийн мэдээлж буйгаар Георгиева мөн өдөр Карнеги олон улсын энх тайвны санд үг хэлэх үеэрээ "ОХУ Украинд түрэмгийлэл үйлдсэн нь дэлхийн эдийн засагт цочрол үүсгэж, цар тахлаас үүдсэн хүндхэн байдлаас гарахаар тэмцэж буй орнуудад асар том ухралт үүсгэж байна" хэмээн цохон тэмдэглэв.

Георгиева мөн ирэх долоо хоногт хийхээр төлөвлөж буй ОУВС болон Дэлхийн банкны хаврын уулзалтын үеэр дэлхийн эдийн засгийн 86 хувийг бүрдүүлдэг 143 орны эдийн засгийн төлөвийг бууруулахаа анхааруулжээ.

Гэсэн хэдий ч ихэнх улс орнууд эерэг өсөлтөө хадгалах талаар тэрээр онцолсон байна.

Украины дайны улмаас хүнсний болон эрчим хүчний үнэ өсч буй нь эдийн засгийн тогтолцоо сул орнуудад дарамт болно гэж дүн шинжилгээ хийсэн байна.

Мөн тэрбээр “Хямралын үед хямрал нүүрлэж байгааг эдийн засгийн талаас нь харвал өсөлт буурч, инфляци өсөж байна. Орлого буурч, иргэдийн нуруун дээрх ачаа нэмэгдэж байна" хэмээн хэлсэн ч Георгиева хатагтай ямар нэгэн эдийн засгийн тооцоо судалгааг дурдаагүй юм.

Эх сурвалж: MBC