Украин улсад үүсээд буй нөхцөл байдлаас үүдэн Европын Холбоо Орос, Беларусь улсын эсрэг хориг тогтоож, улмаар тэдний ачааны тэрэгнүүдийг Европын нутаг дэвсгэрт нэвтрэхийг хориглосон билээ. Тэгвэл хориг өнгөрөгч бямба гарагаас хүчин төгөлдөр хэрэгжиж эхлэхтэй зэрэгцэн олон арван ачааны тэрэг Польш-Беларусийн хил дээр гацжээ.
Тодруулбал, тус хил дээр нийт 80 километр урт дараалал үүссэн бөгөөд хагас сайн өдрөөс хойш ачааны тэрэгнүүдийн зарим нь 33 гаруй цаг тэнд зогсож байгаа юм. Тийнхүү урт дараалал үүсгэн гацсан ачааны тэрэгнүүдийн зургийг Ройтерс агентлаг дроноор буулгаж, олон нийтэд дэлгэсэн байна.
Харамсалтай нь дараалал үүсгэсэн ачааны тэрэгнүүдээс гадна Европын нутаг дэвсгэрт хэдэн мянган ачааны тэрэг хилийн зурвас ч хүрч чадаагүй гацсан байдалтай байгаа бөгөөд тэдгээрийг хэрхэн шийдвэрлэх нь тодорхойгүй байгаа юм. Олон нийтийн зүгээс таамаглаж байгаагаар тэдгээрийг харьяа улс орны эрх баригчид хураах гэнэ.
Харин Польшийн засгийн газраас санаа зовниж буйгаа илэрхийлсэн нь Орос, Беларусийн засгийн газраас тэдний ачааны тэрэгнүүдийн эсрэг адил арга хэмжээ авч магадгүй гэж эмээж байгаа ажээ.
Эх сурвалж: BBC