Даваа гарагт ОХУ-ын ерөнхийлөгч Владимир Путин эдийн засгийн асуудлын тухай хэлэлцэх уулзалтын үеэр тус улсын эдийн засгийн нөхцөл байдал тогтворжиж байгааг мэдэгджээ.
Түүний хэлснээр, “Орос улс урьд өмнө тохиож байгаагүй дарамт, шахалтыг даван тууллаа. Эдүгээ нөхцөл байдал тогтворжиж байна. Рублийн ханш хоёрдугаар сарын эхэн үед ямар байсан тэр түвшиндээ хүрлээ. Бусад валюттай тэнцэх байдлаараа ч рубль эргэн хүчирхэгжиж байна” гэсэн юм.
Мөн тэрээр Оросын инфляц ч тогтворжиж байгаа цохон тэмдэглэсэн байна. Владимир Путин, “Би энд инфляцын асуудлыг тусад нь тэмдэглэе. Инфляц тогтворжиж байгаа. Өнгөрөгч 6 долоон хоногийн хугацаанд манай улсын хэрэглээний үнийн индекс мэдэгдэхүйц өссөн ч дөрөвдүгээр сарын 8-ны өдрийн байдлаар манай улсын инфляц 17.5 хувьд байна” хэмээжээ.
Түүнчлэн уулзалтын үеэр ноён Путин эрх баригч нарыг дотоодын эрэлт хэрэгцээг хангах тал дээр анхаарал хандуулан ажиллахыг зөвлөсөн бөгөөд бизнесийн байгууллагуудад олгох зээлийг илүү хүртээмжтэй болгох тал дээр төвлөрч ажиллах хэрэгтэйг сануулсан байна.
Эх сурвалж: ТАСС