Твиттер платформыг худалдан авч буй тэрбумтан Элон Маскийн хэлснээр, платформ дээрх байгууллага болон засгийн газрын хаягуудаас хураамж авч магадгүй болж байгаа гэжээ. Харин хувь хэрэглэгчдийн зүгээс ямар нэг төлбөр төлөхгүй бөгөөд урьдын адил үнэ төлбөргүй ашиглах юм.
Энэ тухай мэдээллийг тэрээр өөрийн Твиттер хуудсаараа дамжуулан хүргэсэн байна. BBC агентлагийн зүгээс үйл явдлын хүрээнд Твиттерээс тайлбар авах гэж оролдсон ч тэд тайлбар өгөхөөс татгалзжээ.
Төлбөрийг юунд ашиглах талаар тодруулахад, “undo tweet” буюу жиргээг буцаах, уншигчийн төлөвийг идэвхжүүлэх зэрэг нэмэлт үйлчилгээг нээхэд хэрэгтэй гэсэн юм.
Түүнчлэн Элон Маск Твиттер дээрх хуурамч хаягуудыг устгаж, бодит хүмүүсийг л үлдээх хүсэлтэй байгаагаа уламжилсан байна.
Ташрамд дурдахад, Элон Маскийн Твиттерийг худалдан авах ажил энэ жилийг дуустал үргэлжлэх төлөвтэй байгаа юм.
Эх сурвалж: BBC