Цахим худалдааны салбарт тэргүүлэгч Амазон компани үр хөндөлт зэрэг амь насанд аюулгүй эмчилгээ хийлгэх шаардлагатай ажилчдадаа 4000 хүртэлх ам.долларын аяллын зардал олгох болсноо мэдэгджээ.
Учир нь АНУ-д Бүгд найрамдах намын зүгээс үр хөндөлтийг хориглох санал гаргаж байгаа юм. Амазон компанийн хувьд энэхүү шийдвэрийг эрс эсэргүүцэж байгаа бөгөөд дээрх мэдэгдлээрээ өөрсдийн байр сууринд хатуу зогсохоо илэрхийлсэн байна.
Тэдний ажилчдадаа хүргүүлсэн мэдэгдлээс үзвэл, Амазон компанийн ажилчид өөрийн оршин суудаг газраас 100 милийн радиуст шаардлагатай эмчилгээ, үйлчилгээгээ авч чадахгүйд хүрэх аваас компани тэдэнд энэхүү тэтгэмжийг олгох юм.
Шийдвэр тэдний бүх ажилтныг хамрах бөгөөд Амазон компанид харьяатай ажилладаг л бол аж ахуй нэгж, агуулахын ажилтан байхаас үл хамааран тэтгэмжийг шийдэж өгөх ажээ.
Улмаар энэхүү шийдвэр нь ирэх оны нэгдүгээр сараас эхлэн хүчин төгөлдөр хэрэгжих гэнэ.
Эх сурвалж: USA Today