Ирэх есдүгээр сард Хятадын Ханжоу хотод зохион байгуулагдах байсан Азийн спортын наадам хойшилсон тухай Хятадын төв телевиз орон нутгийн цагаар 6-ны өдөр мэдээлэв.

"Ханжоу хотод есдүгээр сарын 10-наас 25-ны хооронд зохион байгуулагдах байсан Азийн 19-р наадмыг хойшлуулах болсныг Азийн Олимпийн Зөвлөлийн Удирдах Зөвлөлийн Ерөнхий нарийн бичгийн дарга өнөөдөр мэдэгдлээ" хэмээн CCTV суваг онцолжээ. Тус мэдээнд дурдаснаар "Ерөнхий нарийн бичгийн дарга хэлэхдээ зохион байгуулагдах огноог хараахан товлоогүй байгаа гээд, тун удахгүй товлох болно" хэмээн нэмэлт тайлбар хийсэн байна.

Сүүлийн сар гаруйн хугацаанд БНХАУ-д цар тахлын халдварын тархалт эрчимтэй нэмэгдэж буй тул тус улсын засгийн газрын зүгээс халдварын голомт илэрсэн бүс нутгуудад хөл хорионы хатуу бодлого хэрэгжүүлсээр байгаа билээ. Тиймээс олон нийт ч Ханжоугийн Азийн наадмыг хойшлуулж болзошгүй хэмээн таамаглаж байсан юм. Ханжоу хот нь хатуу хөл хорионы дэглэм үргэлжилж буй Шанхайгаас 180 км-ийн зайд оршдог аж.

Эх сурвалж: Asiae