CNN агентлагийн 12-ны өдөр мэдээлснээр, ОХУ Украины газар нутгаас дээрэмдсэн үр тариагаа Крымээр дамжуулан Газар дундын тэнгисийн эрэг дагуух орнуудад их хэмжээгээр экспортлохыг оролдож байгаа талаар онцолжээ.

Украин улсын зүгээс энэ талаар хөрш орнууддаа урьдчилан мэдэгдсэний дараа уг үр тариаг ачсан ачааны хөлөг онгоцуудыг улс орнууд хилээр нэвтрүүлэхийг хориглох арга хэмжээ авч эхэлжээ. Гэвч үр тарианы гарал үүслийг нуун дарагдуулах зорилгоор өөр хөлөг онгоцонд шилжүүлэн дахин экспортлох оролдлого хийх магадлалтай хэмээн үзэж байгаа аж.

CNN агентлагийн мэдээлснээр, 30 мянга орчим тонн үр тариа ачсан ачааны хөлөг дөрөвдүгээр сарын сүүлчээр Севастополь хотоос хөдөлж, Босфорын хоолойг гатлан ​​Египетийн хойд хэсэг болох Александриа руу явсан ч хилээр нэвтрэхийг нь зөвшөөрөөгүй байна. Ингээд Ливаны нийслэл Бейрут руу нэвтрэхийг нь мөн хориглосны дараа уг хөлөг Сирийн баруун хойд хэсэгт орших Латакиад байгаа нь тодорхой болжээ.

Оросууд Украин руу довтолсон нь дэлхийн үр тарианы зах зээлийг хүндхэн байдалд оруулаад байгаа билээ. Дайн, ган гачигтай холбоотойгоор улаан буудайн үйлдвэрлэл энэ жил багагүй хэмжээгээр буурах төлөвтэй байна.

Саяхан хиймэл дагуулын мэдээллийн шинжилгээний Keiros компани хиймэл дагуулын зургийн шинжилгээнд үндэслэн энэ онд Украин улс 21 сая тонн улаан буудай үйлдвэрлэнэ гэж таамаглажээ. Энэ нь сүүлийн таван жилийн дунджаас 23 хувиар, өнгөрсөн оны 33 сая тонноос даруй 35 хувиар буурсан үзүүлэлт юм.

Украин өнгөрсөн онд 20 сая тонн улаан буудай экспортолж, дэлхийн 6 дахь том улаан буудай экспортлогч орон болж байсан билээ.

Эх сурвалж: JoongAng