Цар тахлын эхэн үе буюу 2020 оны хоёрдугаар сард БНХАУ-ын ажилгүйдлийн түвшин түүхэн дээд буюу 6.2 хувьд хүрч, хамгийн өндөр үзүүлэлтээр бүртгэгдэж байсан билээ. Тэгвэл өнгөрөгч дөрөвдүгээр сард тус улсын ажилгүйдлийн түвшин дээрх үзүүлэлтэд тун дөхөж, 6.1 хувьд хүрчээ.
Харин ажилгүйдлийн түвшин ийн өсөх шалтгааныг тэд цар хүрээгээ тэлсээр буй хөл хорионы дэглэмтэй холбон тайлбарлаж байгаа юм.
Улмаар Хятадын ерөнхий сайд Ли Кэчянийн тодорхойлсноор Хятад дахь ажилгүйдлийн нөхцөл байдал нь маш ярвигтай бас хүнд байгаа гэжээ. Гэвч засгийн газрын зүгээс ажилгүйдлийн түвшинг энэ жил 5.5 хувиас давуулахгүй байхыг зорин ажиллаж байгаа гэнэ.
Ажилгүйдлийн түвшин ийн өссөн нь тус улсын эдийн засагт шууд нөлөө үзүүлэх болсон юм. Тодруулбал, Хятадын Үндэсний Статистикийн хорооноос мэдээлснээр, тус улс дахь жижиглэн худалдаа өнгөрөгч жилийн мөн үетэй харьцуулахад даруй 11.1 хувиар буурсан бол аж үйлдвэрийн үйлдвэрлэл 2021 онтой харьцуулахад 2.9 хувиар буурчээ.
Эх сурвалж: BBC