Хятадын цэргийн нисэх онгоц Тайванийн Агаарын довтолгооноос хамгаалах таних бүсэд ар араасаа нэвтэрч, цэргийн хурцадмал байдал даамжирч байгаа энэ үед Тайвань довтолгооны нисгэгчгүй онгоц туршсан тухай орон нутгийн хэвлэлүүд 17-ны өдөр мэдээлэв.
Тайванийн үндэсний батлан хамгаалах судалгааны хүрээлэн болох Жуншань үндэсний шинжлэх ухааны судалгааны хүрээлэнгийн саяхан мэдээлснээр, “Тeng Yun 2" нэртэй Тайванийн инженерүүдийн бие даан зохион бүтээсэн довтолгооны нисгэгчгүй онгоцыг Хуалянь хот дахь Жиашань агаарын баазаас хөөргөж, улмаар тус хот орчмын далай дээгүүр 3 цагийн турш 400 гаруй км ниссэн тухай мэдээлсэн байна.
Тайванийн үндэсний батлан хамгаалах судалгааны хүрээлэн нь тус довтолгооны нисгэгчгүй онгоцны алсын зайн нислэгийн чадвар, оптик удирдамж, команд, удирдлагын функц зэргийг шалгах зорилгоор энэ удаагийн туршилтын нислэгийг хийсэн аж.
ОХУ-тай харьцуулахад цэрэг зэвсгийн хүч чадал муутай Украин улс Оросын дайралтыг зогсоохын тулд довтолгооны нисгэгчгүй онгоц ашиглаж байгааг Тайванийн Батлан хамгаалах яам онцлон тэмдэглээд уг салбарын судалгаа, хөгжүүлэлтийг хурдасгах төлөвлөгөөтэй байгаа гэнэ.
Хэвлэлд онцолсноор "”Teng Yun 2” довтолгооны нисгэгчгүй онгоц нь дунд болон алсын зайн тусгалтай учир АНУ-д үйлдвэрлэсэн “MQ-9B” нисгэгчгүй онгоцны хамтаар Тайванийн усан хил дээр удаан хугацааны туршид ажиглалт хийж хамгаалах боломжтой юм" гэж бичжээ.
Эх сурвалж: JoongAng