Gucci, Adidas брэндийн ирэх сард худалдаанд гаргах гэж буй 1329 фунтийн үнэтэй шүхэр борооноос хамгаалахгүйг мэдсэн хятадууд Weibo платформ дээр бухимдлаа илэрхийлжээ.
Нарны хэт ягаан туяанаас хамгаалах зориулалттай тус шүхэр нь усны хамгаалалтгүй бөгөөд зөвхөн нарнаас хамгаалах эсхүл гоёл чимэглэлийн зориулалтаар л ашиглаж болохыг Gucci брэнд албан ёсны сайд дээрээ бичсэн байсан юм. Тийнхүү Weibo платформ дээр “11100 юанийн үнэтэй шүхэр усны хамгаалалтгүй” гэсэн утга бүхий хаштаг 140 сая хандалт авсан байна.
Улмаар хэрэглэгчдийн сэтгэгдлийг үзвэл, “ямар ч хэрэгцээгүй загварын шийдэл”, “Намайг мөнгөгүй байгаа цагт хэн ч намайг энэ шүхрийг авахад ятгаж чадахгүй”, “Хүмүүс тансаг зэрэглэлийн бараа худалдан авахдаа хэрэглээг нь огт боддоггүй” хэмээжээ.
Шүхэр ирэх зургадугаар сарын 7-ны өдөр албан ёсоор худалдаанд гарах юм. BBC агентлагийн зүгээс Gucci болон Adidas брэндүүдээс тайлбар авахыг хүссэн тэд мэдэгдэл хийхээс татгалзсан байна. Харин Gucci брэндийн Хятад дахь салбарын хэвлэлийн төлөөлөгчийн хэлснээр, шүхрийг өдөр тутмын хэрэглээнд зориулж бүтээгээгүй гэжээ.
Эх сурвалж: BBC