Энэтхэг улсын Сангийн сайд Нирмала Ситхараманы бямба гарагт мэдэгдсэнээр, тус улс инфляцтай тэмцэж, чухал хэрэгцээт бүтээгдэхүүний үнийг тогтоон барихын тулд бензин, дизель түлшний татварыг бууруулах болжээ.
Улмаар хатагтай Ситхараманы жиргэснээр, Энэтхэг улс бензин шатахуунаас хураах онцгой албан татварыг литр тутамд 8 рупигээр, дизель түлшнээс хураах онцгой албан татварыг литр тутамд 6 рупигээр бууруулахаар шийдвэрлэсэн байна.
Энэхүү шийдвэрээс улбаалан тус улсын засгийн газрын нэг жилийн орлого 1 их наяд энэтхэг рупигээр хорогдох тооцоо гарсан юм.
Одоогийн байдлаар тус улсад нэг литр бензин 105,41 рупигээр худалдаалагдаж байгаа бол нэг литр дизель 96,67 рупигийн үнэтэй байгаа ажээ.
Түүнчлэн засгийн газраас инфляцтай тэмцэх ажлын хүрээнд өөр нэгэн арга хэмжээ авч хэрэгжүүлэх болсон нь “ядуу” гэх хэмжүүрээс доогуур амьдралтай 90 сая гаруй эмэгтэйчүүдэд ахуйн хийн цилиндрийг 200 рупигийн хөнгөлөлттэй олгохоор баталсан байна.
Энэ нь тус улсын засгийн газрын нэг жилийн орлогоос даруй 61 тэрбум энэтхэг рупиг татах юм.
Мөн хатагтай Ситхараманы мэдэгдсэнээр, засгийн газраас эцсийн бүтээгдэхүүний үнийг бууруулахаар хуванцар, төмөр, ган зэрэг түүхий материалын импортын татварыг ч бууруулах болжээ.
Эх сурвалж: Nikkei Asia