ОХУ Украинд түрэмгийлснээс хойш дэлхийн томоохон компаниуд тус улс дахь бизнесийн үйл ажиллагаагаа зогсоох шийдвэр гаргаад байсан бол өдгөө зах зээлийг бүрмөсөн орхих шийдвэрийг ар араасаа гаргах болжээ.

Дэлхийн хамгийн том кофе шопын сүлжээ компани болох Starbucks 15 жил үйл ажиллагаагаа явуулсны эцэст тус улсын зах зээлийг бүрмөсөн орхих болсноо зарлалаа.

Starbucks компани нь ОХУ улсад 130 салбартай бөгөөд эдгээр нь бүгд орон нутгийн тусгай зөвшөөрөл эзэмшигчид удирдан ажиллуулдаг байсан талаар CNBC суваг мэдээлэв.

Орос дахь тус компанийн бизнесийг татан буулгах талаарх санхүүгийн тодорхой нөхцлүүдийг хараахан ил тод болгоогүй аж.

Starbucks компанийн зүгээс тус улсын салбар дэлгүүрүүдэд ажиллаж байсан 2000 орчим ажилчиддаа зургаан сарын цалинг нөхөн олговор хэлбэрээр олгож, цаашид ажлын байр олоход нь туслахаар төлөвлөж байгаа гэв.

Тус компани нь дайн эхэлснээс хойш хоёр долоо хоногийн дараа буюу гуравдугаар сарын 8-ны өдөр Орос дахь бүх бизнесийн үйл ажиллагаа тэр дундаа бүхий л салбар дэлгүүрүүдээ тодорхойгүй хугацаагаар хааж, бүтээгдэхүүн экспортлохоо ч зогсоогоод байсан юм.

Гүйцэтгэх захирал Кевин Жонсон тухайн үед "ОХУ-ын Украинд хийсэн ямар ч үндэслэлгүй, аймшигт халдлагыг бид буруушааж байна" хэмээн хэлж байжээ.

Америкийн түргэн хоолны сүлжээ McDonald's өнгөрөгч 18-ны өдөр Орос дахь бизнесээ худалдсанаа зарласнаас хойш долоо хоног хүрэхгүй хугацаанд Starbucks компани уг шийдвэрийг гаргаж буй нь энэ юм.

Эх сурвалж: SBS