НҮБ дахь Оросын тэргүүн дэд төлөөлөгч Дмитрий Полянский мягмар гарагт шууд дамжуулалтын Соловьёв сувагт өгсөн ярилцлагадаа, Украин улсын ерөнхийлөгч Володимир Зеленський энх тайвны хэлэлцээрийг үргэлжлүүлэхээр ерөнхийлөгч Владимир Путинтэй ярилцахад бэлэн байгаагаа илэрхийлж буй нь ердөө л өөрийгөө дөвийлгөх гэсэн оролдлого хэмээжээ.

Түүний ийн мэдэгдэх болсон шалтгаан нь даваа гарагийн орой Украины ерөнхийлөгч Володимир Зеленський ОХУ-ын ерөнхийлөгчтэй биечлэн уулзахад бэлэн байгаагаа хуваалцаж, уулзалтын үеэр сөргөлдөөнийг дуусгавар болгох тухайд ярилцах хэрэгтэй гэсэн ганц нөхцөл л тавьсан байна.

Тэгвэл үйл явдлын хүрээнд Дмитрий Полянский, “Энэ бол цэвэр олон нийтийн хүрээнд өөрийгөө дөвийлгөх гэсэн үйлдэл. Үүнийг нь мэдээгүй хүмүүс энэ төрлийн хэлэлцээрийг эхлээд урьдчилан бэлдсэн байх ёстой бөгөөд хэлэлцээрийн үеэр ямар, ямар асуудлыг сөхөх тухайд ч хоёр тал урьдчилан зөвшилцөлд хүрэх учиртай, тэгээгүй цагт хэлэлцээр зохиогоод байх шаардлага огт үгүй гэдгийг ч ойлгодоггүй.

Урьдын хэлэлцээрийг манай талаас тасалдуулаагүй. Зөвшилцлийн хүрээнд хэд хэдэн асуудлыг аль хэдийн ажил хэрэг болгосон бөгөөд бид ч мөн Украины талаас манай асуултуудад хариу өгөхийг нь хүлээж байгаа” гэсэн юм.

Эх сурвалж: ТАСС