Даваа гарагт Ройтерс агентлагаас мэдээлснээр Оросын цэргүүд өнгөрөгч ням гарагт Украины гангийн үйлдвэр болох Азовсталийн эргэн тойрон дахь мина, хог хаягдлыг цэвэрлэх ажлыг эхлүүлжээ.

Дүрс бичлэгээс үзвэл цэргүүдийн зарим нь хог хаягдлаар дүүрсэн замын дээгүүр мина илрүүлэгч барин явж, хаа нэгтээ нуугдсан мина байгаа эсэхийг хайхад зарим нь хог хаягдлын доогуур тэсрэх төхөөрөмж байгаа эсэхийг хайж явсан байна.

Тэдний дундаас өөрийгөө Бабай гэж нэрийдсэн залуу цэрэг, “Энэ бол маш том даалгавар. Дайсны тал өөрсдийн газар нутгийг минаар хучсан. Бид ч тэднийг эсэргүүцэж байхдаа мина байршуулсан. Тиймээс Азовсталийг минагүйжүүлэх ажил хоёр долоо хоног үргэлжлэхээр байгаа. Сүүлийн хоёр хоногийн хугацаанд л гэхэд нийт 100 гаруй тэсрэх аюултай төхөөрөмжийг олж, устгасан. Гэвч ажил цаашид үргэлжлэх болно” хэмээжээ.

Оросын талаас өнгөрөгч баасан гарагт Азовсталийг хамгаалж байсан сүүлийн украин бууж өгсөн болохыг мэдэгдэж байсан юм.

Украины талаас энэ тухай мэдээг батлаагүй ч зэвсэгт хүчний нэгэн ангийн командлагчийн хэлснээр тэднийг зэвсгээ буулгах тушаал өгсөн гэж мэдэгдсэн байна.

Бичлэгийг эндээс хүлээн авч үзнэ үү:

Эх сурвалж: The Reuters