Hyundai Motor компани АНУ-ын зах зээлд борлуулагдсан 239,000 ширхэг автомашинаа хамгаалах бүсний эд ангид асуудал үүссэний улмаас эргүүлэн татахаар болжээ.
Associated Press агентлаг орон нутгийн цагаар 24-ний өдөр мэдээлэхдээ, АНУ-ын Замын хөдөлгөөний аюулгүй байдлын газрын зүгээс энэхүү шийдвэр гаргах болсон шалтгаанаа тайлбарлахдаа тус улсад борлуулагдсан Hyundai Motor компанийн автомашинуудын хамгаалах бүсний сунгагч хөдөлж байх үед гэнэт хагарч, зорчигчид бэртэж гэмтэх эрсдэлтэй байсан талаар цохон тэмдэглэсэн байна.
Уг асуудлаас болж АНУ-д хоёр, Сингапурт нэг хүн бэртсэн болохыг мэдээлсэн юм.
Хамгаалах бүс сунгагч нь тээврийн хэрэгсэлд огцом даралт мэдрэгдэх үед хамгаалах бүсийг зорчигч руу татаж гэмтэхээс сэргийлдэг хэсэг юм.
Энэхүү шийдвэрийн хүрээнд 2019-2022 оны Accent, 2021-2023 оны Elantra, 2021-2022 оны хайбрид Elantra зэрэг автомашинуудыг эргүүлэн татах гэнэ.
Эх сурвалж: YTN