ОХУ-ын арми Хар тэнгист хяналтаа тогтоосноос болж экспортын гол зам нь хаагдан эдийн засгийн хүндрэлтэй тулгараад буй Украин улсын бараа бүтээгдэхүүнд ногдуулах татвараа Европын холбоо түр чөлөөлөх шийдвэр гаргажээ.
Европын зөвлөл орон нутгийн цагаар 24-ний өдөр Украинтай хийх худалдааны татварыг түр хугацаанд чөлөөлөхийг зөвшөөрөх шийдвэр гаргаснаа мэдэгдэв.
Ингэснээр Европын холбоо руу экспортолж буй Украины бүх бараа бүтээгдэхүүн нэг жилийн хугацаанд импортын татвараас чөлөөлөгдөх юм.
Тодруулбал, энэ оны эцэс гэхэд тарифыг нь тэглэх аж үйлдвэрийн болон хөдөө аж ахуйн бүтээгдэхүүнд ч хамаарах бөгөөд Украины импортын бараанд ногдуулах демпингийн эсрэг татварыг түр зогсоохоор болжээ.
Европын зөвлөлийн зүгээс “Энэхүү шийдвэр нь Украины эдийн засгийг мэдэгдэхүйц дэмжих боломжийг олгоно" гэж мэдэгдэв.
"ОХУ-ын ямар ч үндэслэлгүй түрэмгийлэл нь Украины үйлдвэрлэл, тээврийн дэд бүтэц, Хар тэнгист нэвтрэх боломж хийгээд бүр цаашлаад дэлхийн худалдааны чадавхид ихээхэн хохирол учруулж байна. Мөн хүнсний аюулгүй байдалд үзүүлэх нөлөөг дотоод, гадаад ертөнцийн аль алинд нь дутуу үнэлж болохгүй” хэмээн үргэлжлүүлэн буруушаасан байна.
Европын комисс өнгөрсөн сарын 27-ны өдөр татварыг түр хугацаанд чөлөөлөх төлөвлөгөөг зарлаж, өнгөрөгч 19-ний өдөр Европын парламентын нэгдсэн хуралдаанаар баталсан юм. Энэхүү шийдвэр нь гарын үсэг зурж, албан ёсны хэвлэлд нийтлэгдсэнээр хүчин төгөлдөр хэрэгжиж эхэлнэ.
Эх сурвалж: Newsis