Ройтерс агентлагийн орон нутгийн цагаар 25-ны өдөр мэдээлснээр, барууны хүчтэй хориг арга хэмжээнд өртсөөр байгаа ОХУ болон Иран улсууд нь газрын тос, байгалийн хий зэрэг эрчим хүч үйлдвэрлэлийн түүхий эд нийлүүлэх, солилцох, шатахууны тээврийн зангилаа байгуулах тухай хэлэлцсэн байна.

Иран улсад айлчлал хийж буй ОХУ-ын засгийн газрын шадар сайд бөгөөд Эрчим хүчний сайд Александр Новак Оросын төрийн телевизэд ярилцлага өгөхдөө "Иран улс сүүлийн хэдэн жилийн турш хориг арга хэмжээнд өртсөөр байгаа билээ. Мөн бид Ираны туршлагын талаар ярилцсан" хэмээн мэдэгджээ.

Тэрээр хэлэхдээ, "Иран улс хоёр орны хооронд бараа таваар тээвэрлэх гол тээвэр, ложистикийн төв болж чадна. Одоогийн байдлаар жилд 15 сая тонн орчмоор хэмжигдэж буй ОХУ болон Иран улсын гадаад худалдаа хэдхэн жилийн дараа 50 сая тонн болж өсөх магадлалтай” хэмээн цохон тэмдэглэв.

Шадар сайд Новак "Бид Оросын эрчим хүчийг хойд Иранд нийлүүлж, Ираны газрын тос, байгалийн хийг өмнөд нутгаас Ази Номхон далайн бүс нутаг руу экспортлох боломжтой" гэж нэмж хэлээд, ойрын хугацаанд уг тохиролцоог бодит болгож магадгүй хэмээв.

Үүнээс гадна хоёр улс газрын тос, байгалийн хийн зарим төсөлд хөрөнгө оруулах асуудлыг хэлэлцсэн гэж шадар сайд Новак дурджээ.

Иран улс нь өнгөрөгч 2015 онд АНУ, Франц, Их Британи, Орос, Хятад, Герман гэсэн зургаан улстай цөмийн хөтөлбөрөө царцаах юм уу, хорогдуулсны хариуд АНУ, НҮБ, Европын холбооноос авсан хориг арга хэмжээг цуцлах цөмийн гэрээнд гарын үсэг зурсан билээ.

Гэвч АНУ-ын ерөнхийлөгч асан Дональд Трамп 2018 онд уг цөмийн хэлэлцээрээс дангаараа гарсан. Түүнээс хойш Иран улс ч эдийн засгийн хатуу хориг арга хэмжээнд өртөж байгаа юм.

ОХУ-ын хувьд өнгөрөгч хоёрдугаар сард Украинд халдан түрэмгийлснээс хойш АНУ болон барууны орнуудын бүх талын хориг арга хэмжээнд өртсөөр байна.

Тодруулбал, саяхан АНУ Оросын газрын тосны импортыг хориглоод байгаа бол Европын орнууд мөн Тус улсаас импортлодог газрын тос, байгалийн хийн хэмжээг үе шаттайгаар багасгаж бүрмөсөн хориглох хүртэл арга хэмжээ авахаар хэлэлцэж байгаа нь ОХУ-ын чулуужсан түлшний экспортыг эрсдэлд оруулж байгаа юм.

Эх сурвалж: Yonhap