Лхагва гарагт Украины ерөнхийлөгч Володимир Зеленський АНУ-ын төрийн нарийн бичгийн дарга асан Хенри Киссинжерийг хурцаар шүүмжилжээ. Учир нь ноён Киссинжер өнгөрөгч мягмар гарагт Дэлхийн эдийн засгийн форумд дүрс бичлэгээр дамжуулан үг хэлэхдээ Украин улсыг хил хязгаараа шинэчлэн тогтоож, оросуудын эзэлсэн бүсийг орхин хилийн шугамаа зурахыг зөвлөсөн юм.

Түүний хэлснээр, “Энхийн хэлэлцээрийг ойрын хоёр сарын хугацаанд эхлүүлэхгүй бол цаашид нөхцөл байдал улам хурцдаж, үүсэх үймээн самууныг даван туулахад бүр л хүндрэлтэй болох болно. Хилийн шугамыг дахин зурахдаа тулбал өмнө нь ямар байсан яг тэр байранд нь л оруулах хэрэгтэй. Гэхдээ дайныг тэр хэмжээнд хүртэл сунжруулбал шинэ дайн гарах эрсдэлтэй” гэжээ.

Тэгвэл ноён Зеленський түүний мэдэгдлийн хариу болгож, “ОХУ-ыг ямар ч үйлдэл хийсэн байсан “өөрсдийн эрх ашгийг нь харгалзаж үзье” гэж хэлэх хүн байх юм. Оросын талаас Украин руу мянга мянган пуужин харваж, хэдэн арван мянган украинчууд амь үрэгдэж, Буча, Мариуполь зэрэг хотууд сүйдэж, оросууд “шүүх бааз” байгуулж байхад ч ингэж хэлэх хүн байлаа. Энэ бүхнийг оросууд Европ тивд хийсэн байхад Давост ноён Киссинжерээс авахуулан Украин улсыг ОХУ-д газар нутгаасаа өг гэж зөвлөх хүмүүс байна” гэж мэдэгджээ.

Тийнхүү ерөнхийлөгч Зеленський Киссинжерийн үзэл суртлыг 1938 оны нацист германуудын үзэлтэй жишсэн байна. Зеленський, “Ноён Киссинжерийн хуанли 2022 биш 1938 оныг л зааж, тэрээр өөрийгөө Давост цугласан олонд хандаж үг хэлж байгаа бус харин дайны үеийн Мюнхен хотын иргэдэд хандаж байгаа гэж бодсон бололтой” хэмээжээ.

Эх сурвалж: CNN