ХБНГУ-ын Эдийн засгийн сайд Роберт Хабекын ням гарагт мэдэгдсэнээр тус улс ирэх өвөлд бэлтгэж, байгалийн хийн хэрэглээгээ бууруулан нүүрсний цахилгаан станцуудаа түлхүү ажиллуулах болжээ.

Түүний өгүүлснээр, “Нөхцөл байдал маш ноцтой байна. Тиймээс бид урьдчилан сэргийлэх арга хэмжээгээ өргөжүүлж, байгалийн хийн хэрэглээгээ бууруулах нэмэлт арга хэмжээг авч хэрэгжүүлж байна. Энэ нь юу гэсэн үг вэ гэвэл бид байгалийн хийн хэрэглээгээ ирэх намар гэхэд улам бууруулж, хэмнэсэн байгалийн хийгээ нөөцлөх болно. Эс бөгөөс нөхцөл байдал өвлийн улиралд тун ярвигтай болно” гэсэн юм.

ХБНГУ-ын хувьд байгалийн хийн импортынхоо 50 гаруй хувийг ОХУ-аас татдаг байсан учир хоригийн арга хэмжээ тэдний эрчим хүчний хэрэглээнд шууд нөлөөлж байгаа билээ. Улмаар дайн эхэлснээс хойш тэд ОХУ-аас татан авах байгалийн хийн импортоо 35 хувь хүртэл бууруулаад байгаа юм.

Түүнчлэн ноён Хабекын хэлснээр эрчим хүчний үнэ хурдацтай нэмэгдэж байгаа нь ноён Путиний Европыг барьц алдуулж, биднийг бутаргах гэсэн стратегийн шинжтэй үйлдэл гэнэ.

Албаныхны мэдээлж байгаагаар өдгөө Герман улсын байгалийн хийн нөөцлүүр 56 хувийн дүүргэлттэй байгаа бөгөөд ирэх аравдугаар сарын нэгэн гэхэд 80 хувь, арван-нэгдүгээр сарын нэгэн гэхэд 90 хувийн дүүргэлттэй байхаар зорьсон ажээ.

Эх сурвалж: CNN