Канадын Сангийн сайд Кристиа Фрийландын даваа гарагт мэдээлснээр тус улс хоригийн улмаас битүүмжлэгдсэн Оросын хөрөнгийг албадан хураах хуулийн төслийг батлахаар төлөвлөж байна гэжээ.

Тэрээр Торонто хотод зохион байгуулагдсан эдийн засгийн хэлэлцүүлэгийн үеэр хэвлэлийнхэнд хандаж, “Ойрын хугацаанд миний өргөн барьсан төсвийн тухай хуулийн төсөл батлагдана гэж бид найдаж байна. Тэрхүү төсөл батлагдвал Канад улсын хувьд анх удаа хоригт багтсан хөрөнгийг царцаах, мөн албадан хураах эрх үүснэ” гэсэн юм.

Түүнчлэн хатагтай Фрийландын хэлснээр энэ тухай асуудлыг тэд АНУ болоод бусад олон улсын холбоотонтойгоо хэлэлцсэн бөгөөд “Украин улсыг сэргээн босгох мөнгийг олно гэдэг маш, бүр маш чухал хэрэг болно. Харин миний хувьд Оросын битүүмжлэгдсэн хөрөнгөөр тус ажлыг санхүүжүүлэх шиг оновчтой гаргалгаа байхгүй гэж үзэж байна” гэж мэдэгджээ.

Эх сурвалж: ТАСС