Шведийн Braathens Regional Airlines (BRA) компани орон нутгийн цагаар 21-ний өдөр дэлхийд анх удаа "агаарын хөлгийн тогтвортой түлш"-ийг 100 хувь ашиглан хийсэн туршилтын нислэг амжилттай болсныг зарлав.

Мөн өдөр тус авиа компани Франц, Италийн хамтарсан нисэх онгоц үйлдвэрлэгч ATR компанийн 72-600 загварын нисэх онгоцыг Финляндын нефть боловсруулах Neste-гийн “агаарын хөлгийн тогтвортой түлш”-ээр цэнэглэж туршилтын нислэгийг амжилттай хийсэн байна. Уг нислэг Шведийн өмнөд хэсэгт орших Мальмо хотоос эхэлж 550 км-ийн зайд орших нийслэл Стокгольм хүртэл 1 цаг 20 минут орчим үргэлжилжээ.

Тус нислэгт ашигласан Neste компанийн “агаарын хөлгийн тогтвортой түлш” нь хоол хүнсний хаягдал өөх, тосыг ашиглан хийдэг бөгөөд ердийн онгоцны түлштэй харьцуулахад нүүрстөрөгчийн ялгаруулалтыг 80 хувь хүртэл бууруулах боломжтой байдаг аж.

Агаарын хөлгийн нислэгийн мэдээллийн бодит цагийн үйлчилгээ болох "Flight Radar 24"-ийн мэдээлснээр Европын Нисэхийн аюулгүй байдлын агентлагийн (EASA) зүгээс энэ төрлийн түлшийг 50 хүртэлх хувиар ашиглах зохицуулалтыг хийсэн байдаг ба зөвхөн энэхүү туршилтын нислэгийн хувьд уг хязгаарлалтыг түр хугацаанд чөлөөлж 100 хувь тогтвортой түлш ашиглан хийсэн байна.

ATR компанийн гүйцэтгэх захирал Стефано Бортоли хэлэхдээ "Өнөөдөр дэлхийн нисэхийн салбарын хувьд түүхэн өдөр боллоо. Энэхүү нислэг нь агаарын тээврийн салбар нүүрстөрөгчийн ялгаруулалтыг бууруулахад шилжиж буй чухал үйл явдал болон тэмдэглэгдэн үлдэж байна” хэмээн сэтгэгдлээ илэрхийлэв.

Эх сурвалж: Chosun