Амазоны дуут туслах Алексагийн шинэ загвар хэрэглэгчийн төрөл төрөгсдийн дуу хоолойг дуурайх чадвартай байх гэнэ.
Амазон компаниас лхагва гарагт танилцуулснаар тэд Алексаг ямар ч хүний дуу хоолойг дуурайж чаддаг болгохоор хөгжүүлж байгаа гэсэн бөгөөд төхөөрөмж хэрэглэгчийн хүсэлтэд нийцүүлэн нас барсан ойр дотны хүнийх нь хоолойтой ч ижил дуугарах юм.
Бүтээгдэхүүний танилцуулгыг тэд re:MARS хиймэл оюун ухааны инновацад төвлөрсөн чуулга уулзалтын үеэр хийсэн бөгөөд танилцуулга бичлэгээс үзэхэд Алекса балчир хүүд үлгэр уншиж өгч байгаа харагдах ч дуу хоолойн хувьд эмээгийнх нь хоолойг дуурайсан байжээ.
Амазоны дэд ерөнхийлөгч Рохит Прасадын хэлснээр, төхөөрөмжид шинэ хоолой таниулахад ердөө нэг минут хүрэхгүй аудио хэрэгтэй гэнэ.
Гэвч тэдний зүгээс шинэчлэгдсэн бүтээгдэхүүнийг хэзээнээс худалдаанд гаргахаа тодорхойлж хэлээгүй байна.
Энэхүү өөрчлөлтийг оруулах болсон гол шалтгаан нь Амазон хиймэл оюун ухаан бүхий төхөөрөмжүүдийг илүү хүншүүлэхийг хүссэнтэй холбоотой гэнэ.
Эх сурвалж: CNN