ОХУ-ын арми Украины үр тариан экспортод саад учруулж буйн улмаас Африк болон Ойрхи Дорнодод хүнсний хямрал хурцдаж байгаа энэ үед Оросын цэргүүд орон нутгийн цагаар 22-ны өдөр Украины өмнөд хэсгийн Миколаев боомт хотын үр тарианы терминал руу дайралт хийжээ.

Украинская правда зэрэг орон нутгийн хэвлэлд мэдээлснээр, үдээс хойш Оросын цэргүүд Миколаев хот руу пуужингаар довтолж, нэг хүн амь үрэгдэж, гурван хүн шархадсан гэж тус хотын дарга Александр Сенкевич мэдэгдэв. Шатах тослох материал хадгалж байсан хоёр хувийн компани пуужинд өртөж, наранцэцгийн тос хадгалдаг агуулахад гал гарсан гэж Сенкевич мөн мэдэгдсэн байна. Миколаев мужийн амбан захирагч Виталий Ким хэлэхдээ, Оросууд долоон пуужин харвасан гэжээ.

Канадын хөдөө аж ахуйн Byterra болон АНУ-ын үр тарианы худалдааны Bungie компанийн эзэмшдэг үр тарианы экспортын хоёр терминал Оросын цэргүүдийн халдлагад өртсөн тухай Wall Street Journal мэдээлжээ. Byterra хэлэхдээ, тус компанийн эзэмшлийн үр тарианы терминал нь халдлагад өртөж, гал гарсны улмаас нэг хүн түлэгдэн эмчилгээ хийлгэж байгаа гэв. Харин АНУ-ын Bungie компанийн зүгээс үр тарианы терминал нь халдлагад өртсөн нь үнэн боловч өнгөрөгч 2-р сарын 24-ний өдөр ОХУ Украинд халдан түрэмгийлснээс хойш үйл ажиллагаагаа зогсоогоод байсан тул гэмтэж бэртсэн хүн байгаагүй гэжээ.

Мөн Оросын арми Украины тариачид болон үр тарианы зуучлагчдын Румыны Константа боомт руу үр тариа тээвэрлэхэд ашигладаг гүүр, наранцэцгийн тос боловсруулах үйлдвэр болон бусад үр тарианы терминал руу дайрсан гэж Wall Street Journal сонин мөн мэдээлэв. Мөн өдрийн өглөө Украины хилийн ойролцоох ОХУ-ын Новосачтинск дахь газрын тос боловсруулах үйлдвэрт Украиных гэж таамаглаж буй хоёр дрон халдлага үйлдсэний дараа Оросын армийн энэхүү халдлага болсон юм.

ОХУ-ын хувьд Украины улаан буудайн экспортод саад учруулж байна гэсэн барууныхны мэдэгдлийг няцаасаар ирсэн ч уг халдлага нь хүнсний хангамжийг онилсон гэдэг нь тодорхой байна. Оросын зэвсэгт хүчин Хар тэнгисийг бүслэн хаасны улмаас Украинд 18 сая тонн үр тариа гацаад байгаа билээ. НҮБ-ын зүгээс Украин болон ОХУ, Турктэй гэрээ хэлэлцээр хийж байгаа ч төдийлөн ахиц дэвшил гараагүй аж. Европын холбооны гадаад харилцаа, аюулгүй байдлын бодлогын дээд түвшний төлөөлөгч Руссеф Боррел өнгөрөгч 20-ны өдөр зохион байгуулагдсан Европын холбооны гишүүн орнуудын Гадаад хэргийн сайд нарын хурал дээр ОХУ Украины үр тариан экспортод саад учруулж буйг дайны гэмт хэрэг гэж шүүмжилсэн юм.

Үүний зэрэгцээ Их Британийн Ерөнхий сайд Борис Жонсон Le Monde зэрэг Европын өдөр тутмын дөрвөн томоохон хэвлэлд нэгдсэн ярилцлага өгөх үеэрээ “Оросын цэргүүд аажмаар урагшилж, Украины хотууд болон энгийн иргэдэд аймшигт хохирол учруулж байгаагийн зэрэгцээ цэрэг, зэвсгийн зардалд асар их хэмжээний хөрөнгийг зарцуулж байна. Манай Батлан ​​хамгаалахын тагнуулын газрын үзэж байгаагаар ойрын хэдэн сарын дотор Оросын армийн довтолгооны хүч нь сулрах хэмжээнд хүрч магадгүй" гэж тэр хэлэв. Ерөнхий сайд Жонсон “Бид үргэлжлүүлэн украинчууд сөрөг довтолгоо хийх боломжийг олгохуйц техник хэрэгслээр хангах ёстой” гээд энэ сарын 26-ны өдөр ХБНГУ-д болох "Их 7"-гийн бүлгийн дээд хэмжээний уулзалтаар энэ асуудлыг хэлэлцэнэ гэж мэдэгдсэн байна.

Эх сурвалж: Kyunghyang