АНУ-д бууны хяналтын тухай шинэ хууль Конгрессоор батлагдаад байгаа ба уг хууль хүчин төгөлдөр болоход зөвхөн ерөнхийлөгч Жо Байдены гарын үсэг шаардлагатай байгаа юм.
19 хүүхэд, хоёр багш гээд нийт 21 хүний амийг авч одсон Техас мужийн Увалди бага сургуульд болсон хэрэг болон 10 хүний эрдэнэт амь үрэгдсэн Нью-Йорк мужийн Баффало хотын супермаркетад болсон хэрэгтэй холбогдуулан энэхүү хуулийн төслийг боловсруулжээ.
Ингэснээр 1993 онд автомат буу хэрэглэхийг хориглох тухай хууль батлагдаж байснаас даруй 30 орчим жилийн дараа анх удаагаа бууны хяналтыг чангатгасан хууль Ардчилсан болон Бүгд найрамдах намын хамтарсан тогтоолоор Конгресс болон Сенатаар батлагдаж буй нь энэ боллоо.
Ассошиэйтед Пресс агентлагийн орон нутгийн цагаар 24-ний өдөр мэдээлснээр, бууны хяналтын тухай хуулийн төслийг 234 гишүүн дэмжиж, 193 гишүүн эсэргүүцсэн байна. Харин үүнээс өмнө Сенатад 65 гишүүн дэмжиж, 33 нь эсэргүүцснээр баталсан юм.
Уг хуулийн төсөлд 21-ээс доош насны буу худалдан авагчдад тавих шаардлагыг чангатгаж, сургууль орчмын аюулгүй байдал, сэтгэцийн эрүүл мэндийн хөтөлбөрт зориулж 15 тэрбум ам.долларын төсөв тусгасан байна.
Хуулийн төсөлд 18-21 насны залуучууд буу худалдан авахыг болон гэр бүлийн хүчирхийлэл үйлдсэн этгээдийн галт зэвсгийн хэрэглээг зохицуулах, орон нутгийн албаны хүмүүсийн аюултай гэж үзсэн этгээдүүдийн зэвсгийг түр хураахад туслах зорилгоор тавигдах шаардлагыг аажмаар чангатгах аж.
Мөн Улаан тугийн тухай хуулийг хэрэгжүүлдэг мужуудад урамшуулал олгох саналыг оруулсан байна. Энэхүү хуулийн гол санаа нь аюултай этгээдийн галт зэвсгийг хураах саналыг холбогдох албан тушаалтанд хүссэн хүн нь гаргах боломжийг олгодог юм.
Мөн энэ хуулийн төсөлд сэтгэцийн эрүүл мэндийн хөтөлбөр, сургуулиудыг дэмжихэд зориулж 13 тэрбум ам.доллар зарцуулахаар тусгасан байна.
Төлөөлөгчдийн танхимын Шүүхийн дарга Жералд Надлер өнгөрсөн сард болсон аймшигт хэргийн хохирогчдын талаар "Ямар ч хууль тогтоомж хайртай нэгнээ алдсан гэр бүл, хамт олныг эргээд элэг бүтэн болгож чадахгүй. Гэхдээ бид өөр хэн нэгэн үүн шиг хайртай нэгнээ цаг бусаар алдахаас сэргийлж чадна" хэмээн цохон тэмдэглэжээ.
Эх сурвалж: Newsis