Дэлхийн тансаг зэрэглэлийн брэндүүд хамтран блокчэйнд суурилсан платформыг бий болгон хуурамч бараа бүтээгдэхүүнтэй тэмцэж эхэлжээ.
CNN Business сувгийн орон нутгийн цагаар 26-ны өдөр мэдээлснээр, Францын Louis Vuitton Moët Hennessy (LVMH) өнгөрсөн оны дөрөвдүгээр сард өрсөлдөгч Prada болон Cartier нартай хамтран Aura Blockchain Consortium-ыг байгуулжээ.
Уг ашгийн бус байгууллага нь блокчэйн технологид суурилсан платформыг хөгжүүлсэн ба энэ нь тансаг зэрэглэлийн бүтээгдэхүүнд дижитал баталгаа өгдөг аж. Тус дижитал баталгаанд тухайн бүтээгдэхүүнийг хэзээ, хаана, хэдэн ширхгээр үйлдвэрлэсэн гэх мэт мэдээллийг оруулж өгдөг баына.
Хэрэглэгчид дижитал баталгаан дээрх мэдээллийг вэбсайт эсвэл ухаалаг утасны аппликэйшнээр дамжуулан шалгах боломжтой юм. Одоогоор 20 орчим тансаг зэрэглэлийн брэндүүд уг блокчэйнд суурилсан платформыг ашиглаж байгаа бөгөөд 17 сая тансаг зэрэглэлийн бүтээгдэхүүн тус платформд бүртгэлтэй байгаа гэв.
“Street wear” загвар зохион бүтээгчдийн "OTB" групп болон автомашин үйлдвэрлэгч Мерседес Бенз компани саяхан үндсэн гишүүн болон элссэн байна. Гишүүдээ энгийн боллн үндсэн гэж 2 хуваапаг ба үндсэн гишүүд платформ хөгжүүлэлтийн зардлыг хуваан хариуцахаас гадна консорциумын удирдлагуудад дуу хоолойгоо хүргэх эрх нь хамаагүй нээлттэй байдаг аж.
Тансаг зэрэглэлийн брэндүүд блокчэйн хэмээх хамгийн сүүлийн үеийн технологид найдах болсон шалтгаан нь хуурамч бүтээгдэхүүнээс үүдсэн хохирол маш их байгаатай холбоотой гэж CNN Business суваг тайлбарлав. Зөвхөн 2017 онд л гэхэд тансаг зэрэглэлийн брэндүүд хуурамч бараа бүтээгдэхүүний улмаас 98 тэрбум ам.долларын борлуулалтаа алдсан гэсэн тооцоо гарчээ.
"Эдгээр брэндүүд нь бусад бүх талаараа бие биетэйгээ өрсөлдөгчид хэдий боловч энэ платформыг хамгийн хурдан бөгөөд найдвартай байдлаар хөгжүүлэхийн тулд хамтран ажиллаж байна" гэж тус платформын албаны хүн онцлон тэмдэглэсэн байна.
Эх сурвалж: Asiae
Одоо л технологи ямар жухал вэ гэдгийг олж харлаа. Ирээдүй илүү сайхан болж байна.