Япон улсын засгийн газраас хэт халуун улирал эхэлж байгаагаас үүдэн эрчим хүчний хомсдол үүсэж болзошгүй хэмээн сануулснаас хойш тус улсад үйл ажиллагаа явуулдаг бизнесийн байгууллагууд эрчим хүчний хэрэглээгээ танах болжээ.
Японы Эдийн засаг, худалдаа, аж үйлдвэрийн яамнаас мэдэгдсэнээр эрчим хүчний хэрэглээний хүрээнд зарласан түгшүүр лхагва гарагт хүчинтэй үйлчилнэ гэсэн бөгөөд Токиогийн Цахилгаан станцаас эрчим хүч татан авч хэрэглэдэг бүсүүдэд нийлүүлэлт багасаж, эрэлт ихсэх гэнэ. Улмаар тус улсад үйл ажиллагаа явуулдаг бөөний худалдааны төвөөс өгсүүлээд үйлдвэрүүд хүртэл эрчим хүчний хомсдолоос зайлсхийхийн тулд эрчим хүч хэмнэх журмуудыг баталж, мөрдөх болсон байна.
Тийнхүү цахилгаан эрчим хүчээ хэмнэх хүчин чармайлтын хүрээнд Японы 7-Eleven сүлжээ дэлгүүр 15:00-18:00 цагийн хооронд шарсан хоолоор үйлчлэхгүй эсхүл гадна үзүүлэнгийн хайрцгуудыг дүүргэхгүй байхаар шийдвэрлэсэн бол FamilyMart сүлжээ дэлгүүр 16 мянган салбартаа цахилгаан хэрэглээгээ танаж, 60 хүртэлх хувиар бууруулах болжээ.
Судалгаагаар Япон улсын нийт эрчим хүчний 70 орчим хувийг бизнесийн болон аж үйлдвэрийн байгууламжууд үйл ажиллагаандаа зарцуулдаг юм.
Үйл явдлын хүрээнд Тоёота, Мицубиши зэрэг томоохон компаниуд ч эрчим хүчээ хэмнэх журам баталжээ.
Эх сурвалж: Nikkei Asia