Мягмар гарагт АНУ-ын Сангийн яамнаас Оросын алтны импортод хориг тавьж буйгаа мэдэгджээ. Тогтоолыг тэд өөрсдийн цахим хуудаснаа нийтэлсэн байна.

Тогтоолд дурдсанаар, “ОХУ-аас гаралтай алтыг хуулиар зөвшөөрсөн хэмжээнээс их хэмжээгээр эсхүл лицензгүй, Гадаад хөрөнгө хяналтын газраас олгосон зөвшөөрөлгүй АНУ-д импортлон оруулахыг хориглоно.

Энэхүү тогтоолд өнөөдрийг хүртэл ОХУ-ын нутаг дэвсгэрээс гадуур байсан, гарал нэгтэй алт хамаарахгүй” гэжээ. Тийнхүү тогтоол олон нийтэд хүрсэн мөчөөс эхлэн хүчин төгөлдөр хэрэгжинэ гэсэн байна.

Сангийн яамнаас цохон тэмдэглэснээр энэхүү хориг нь ОХУ-ын Төв банк, Үндэсний хөрөнгийн сан, ОХУ-ын Сангийн яамны алттай холбоотой бүх гуйвуулга, шилжүүлэгт шууд хамаарна гэжээ.

Тэдний зүгээс Оросын эсрэг тавьсан ээлжит хориг нь дан ганц Оросын алтны импортод хамаараад зогсоогүй бөгөөд Сангийн яамнаас Оросын хүнд даацын автомашин үйлдвэрлэгч Камаз компанид хүртэл хориг тавьсан байна. Түүнчлэн Камазтай холбоо бүхий хувь хүн, байгууллагуудыг ч хоригт оруулсан бөгөөд Оросын сансрын төв, Иркут корпорац, Чкалов нислэгийн туршилтын төв болон бусад байгууллагын эсрэг хориг тавьжээ.

Эх сурвалж: ТАСС