Украины ерөнхийлөгч Володимир Зеленський Кременчук хот дахь худалдааны төвийг Оросын пуужин харваж буй бичлэгийг олон нийтэд дэлгэжээ. Бичлэгийг тэрээр дайны тухай ээлжит дүрс бичлэг бүхий мэдэгдэлдээ хавсаргасан байна.

Түүний хэлснээр, “Бичлэг хүрч буй энэ өдрийн оройн байдлаар ОХУ-ын талаас манай хотууд руу харвасан нийт пуужингийн тоо 2811 боллоо. Үүнээс гадна өчнөөн олон агаарын бөмбөг, их буу харвасан.

Өнөөдөр НҮБ-ын Аюулгүйн Зөвлөл манай хөрсөн дээр оросуудын гарт амиа алдсан бүх украиныг хүндэтгэн чимээгүй зогслоо. Харин Аюулгүйн Зөвлөлийн уулзалтад оролцож байсан Оросын төлөөлөгчид “алуурчин” шиг харагдахгүйн тулд бусадтай адил зогсохоор шийдсэн.

Гэвч Украины ард иргэдийн эсрэг эхлүүлсэн энэ дайнд олон гэм зэмгүй хүмүүсийн аминд хүрч байгаа нь ОХУ, Оросын терроризм гэдгийг бүгд мэднэ.

Би өнөөдөр энэхүү дүрс бичлэг бүхий мэдэгдлээ нэгэн нотлох баримтаар дуусгахыг хүсэж байна. Ингэснээр Кременчук дахь худалдааны төв рүү пуужин харвасан хэргийг хэн ч гуйвуулж чадахгүй. Яг энэ объектыг Оросын пуужин зориудаар оносон. Мэдээж, энэ бол тушаалын дагуу байсан. Оросын алуурчид пуужинг яг энэ л координатыг чиглүүлэн харвасан нь ч илт. Тэд энх тайван Кременчук хотод, худалдааны төвд аль болох олон хүн хөнөөхийг хүссэн” хэмээжээ.

Эх сурвалж: Украинская Правда