Их Британи улсын эрх баригчдын зүгээс ОХУ-д “Никелийн хаан" гэгдэн хөрөнгө орлогын хэмжээгээрээ улсдаа хоёрдугаарт бичигддэг Владимир Потанин болон тус улсын ерөнхийлөгч Владимир Путины үеэл зэрэг хэд хэдэн Оросын иргэнд хориг арга хэмжээ авлаа.
Британийн засгийн газар орон нутгийн цагаар 29-ний өдөр Оросын эсрэг нэмэлтээр 13 шинэ хориг арга хэмжээ авахаа зарлав.
Тус улсын засгийн газрын мэдээлснээр Оростоо хөрөнгө орлогын хэмжээгээрээ хоёрдугаарт бичигддэг Норникел компанийн захирал Потанин нь Украиныг эзлэн түрэмгийлсний дараа ч Путиныг үргэлжлүүлэн дэмжиж, Росбанк болон Тинькофф банкны хувьцааг худалдан авах замаар түүний баялгийг нэмэгдүүлсэн байна.
Потанины цэвэр хөрөнгө 13 тэрбум фунт стерлинг бөгөөд тэрээр дэлхийн хамгийн том цэвэршүүлсэн никель, палладий үйлдвэрлэгч Норникель компанийн 36 хувийг эзэмшдэг аж.
Түүнчлэн Путины үеэл, нүүрсний үйлдвэрлэл эрхэлдэг Колмар Группын ТУЗ-ийн дарга Анна Цивилева мөн жагсаалтад багтжээ.
Их Британийн засгийн газрын хэвлэлийн төлөөлөгч “Өнөөдөр батлагдсан энэхүү хориг арга хэмжээнд Путиныг тойрон хүрээлэгчид хамрагдсан нь хориг арга хэмжээ хэнийг ч ялгахгүй гэдгийг харуулж байна” хэмээн онцлон тэмдэглэсэн байна.
Үүнээс гадна Их Британийн засгийн газар Сири дэх Ассадын дэглэмийг дэмжсэн ОХУ-ын хувь хүн, аж ахуй нэгжүүдэд хориг арга хэмжээ авсны дээр оросууд тус улсын аливаа санхүүгийн үйлчилгээ үзүүлэгч байгууллага дээр итгэлцлийн үйлчилгээ авах эрхийг хязгаарлах шийдвэрийг мөн гаргажээ.
Эх сурвалж: Yonhap