Украин улсын зэвсэгт хүчнээс оросууд тус улсын зүүн хэсэгт байрладаг Лисичанськ хотыг эзлэн авсан болохыг баталжээ.
Украины армийн жанжин штабаас мэдэгдсэнээр, “Лисичанськ хотод ширүүн тулалдаан болж өнгөрсөн хойно манай батлан хамгаалах хүчин эзлэгдсэн бүс, шугамаас ухрахаас өөр аргагүйд хүрлээ” гэсэн юм. Тэдний зүгээс цэргүүдийнхээ амь насыг аврахын тулд ухрах шийдвэр гаргасан хэмээжээ.
Тэднийг ийн мэдэгдэхээс өмнө ОХУ-ын Батлан хамгаалахын сайд Сергей Шойгу долоодугаар сарын 3-ны өдөр тэдний цэргүүд Лисичанськ хотыг эзэлж, Луганск мужийг бүхэлд нь өөрсдийн мэдэлд оруулсан болохыг мэдэгдээд байсан юм.
Украины зэвсэгт хүчний ерөнхий штабын хэлснээр байлдааны талбарт Оросын тал зэр зэвсэг, хүн хүчний хувьд давуу байдалтай байсан гэнэ.
Үйл явдлын хүрээнд ерөнхийлөгч Володимир Зеленский тэдний цэргүүд байлдааны илүү боловсронгуй тактик, илүү орчин үеийн зэр зэвсэгтэйгээр Лисичанськ мужид эргэн очно гэдгийг амласан юм.
Лисичанськ хотод болсон байлдааны хувьд ОХУ-ын Бүгд Найрамдах Чечень улсын цэргүүд хүч хавсарсан байна. Тодруулбал, бямба гарагт тус улсын удирдагч Рамзан Кадыров Чечений цэргүүд Лисичанськ хотыг бүрэн бүсэлсэн бөгөөд дайсны талд гарах гарц байхгүй болсон тухай өөрийн Телеграм хуудаснаа нийтэлжээ.