Өнгөрөгч сард Турк улсын инфляц ойролцоогоор 79 хувьд хүрч, сүүлийн 25 орчим жилийн хугацаанд үзэгдээгүй өндөр үзүүлэлт бүртгэгджээ.
Тодруулбал, Туркийн Статистикийн Институтээс мэдэгдсэнээр зургаадугаар сард тус улсад инфляцын түвшин 78.62 хувьд хүрсэн нь шинжээчдийн урьдчилсан тооцоог давж, сүүлийн 24 жилийн хугацаанд үзэгдээгүй өндөр хувьд хүрчээ. Энэ нь тус улсын тавдугаар сард бүртгэгдсэн инфляцаас даруй 4.9 хувиар өссөн үзүүлэлт юм.
84 сая хүн амтай Турк улсын хувьд бараа бүтээгдэхүүний үнэ эрчимтэй өсөж байгаа бөгөөд Орос, Украины дайнаас үүдэн тус улсын эдийн засаг ойрын хугацаанд сэргэх төлөвгүй байгаа ажээ.
Тийнхүү Турк улсад тээврийн үнэ өнгөрөгч онтой харьцуулахад 123.37 хувиар өссөн бол хүнсний бүтээгдэхүүн, алкогольгүй уух зүйлсийн үнэ 93.93 хувиар өссөн байна.
Ерөнхийлөгч Эрдоганы хувьд төрийн эрхэнд гарснаас хойш бодлогын хүүг “бүх чөтгөрийн эх” гэж тодорхойлон бодлогын хүүгээ өсгөхгүй олон жил болсноор тус улсын мөнгөн тэмдэгтийн ханш эрчимтэй унасан юм. Улмаар түүний бодлогыг эсэргүүцсэн төв банкны ерөнхийлөгчид ээлж дараалан халагдаж, Турк улсын төв банк 2 жилийн дотор 4 ерөнхийлөгчийн нүүр үзжээ.
Эх сурвалж: CNBC