Их Британийн зүгээс Беларусь улсыг ОХУ-ыг дайн өдүүлэхэд дэмжлэг үзүүлсэн хэмээн үзэж 60 сая фунт стерлингийн үнэ бүхий бараа бүтээгдэхүүний импорт, экспортыг хязгаарлан тус улсын эсрэг эдийн засгийн нэмэлт хориг арга хэмжээ авахаар болжээ.

Их Британийн засгийн газар орон нутгийн цагаар 4-ний өдөр Беларусь улс руу боловсруулсан газрын тосны бүтээгдэхүүн, квантын тооцоолол зэрэг дэвшилтэт технологид шаардлагатай эд анги, тансаг зэрэглэлийн барааг экспортлохыг хориглоно гэж мэдэгдсэн тухай Ройтерс агентлаг мэдээллээ.

Мөн Беларусь улсаас нийлүүлдэг гангийн импортыг зогсоож байгаагийн дээр тус улсын аж ахуй нэгж, компаниуд Их Британийн Лондон хотод бонд, үнэт цаас гаргахыг хориглож байгаа ба энэхүү хоригарга хэмжээ энэ сарын 5-ны өдрөөс хэрэгжиж эхлэх юм.

Украины хилийн орчимд ОХУ-ын цэргийг байршуулж, өөрийн орны агаарын орон зайдаа ОХУ-ын армийн тийрэлтэт онгоцыг нисэхийг зөвшөөрснөөр Беларусь улс нь Оросыг Украин руу довтлоход дэмжлэг үзүүлсэн гэж Их Британи улс үзэж байгаа аж.

Түүнчлэн Их Британийн тал Беларусь улсаас импортолж буй зарим бараа бүтээгдэхүүний татварыг 35 пунктээр нэмэгдүүлснээс гадна тус улсын ерөнхийлөгч Александр Лукашенко болон төрийн өндөр албан тушаалтнуудад хориг арга хэмжээг өмнө нь авч байсан билээ.

Эх сурвалж: Yonhap