Даваа гарагт Украины ерөнхий сайд Денис Шмигаль Оросын түрэмгийлэл өндөрлөсөн хойно Украин улсыг сэргээн босгоход шаардлагатай 3 шатлал бүхий төлөвлөгөөнд нийт 750 тэрбум ам.доллар хэрэгтэй болохыг мэдэгджээ.

Швейцар улсаас зохион байгуулсан Украиныг Сэргээн босгох Бага хурлын үеэр түүний хэлснээр одоогийн байдлаар Оросын түрэмгийллээс үүдэн тус улсын дэд бүтцэд 100 гаруй тэрбум ам.долларын шууд хохирол учирсан гэсэн юм.

Денис Шмигалийн өгүүлснээр, “Өнөөдөр, Украин улсын дэд бүтцийн шууд хохирол 100 гаруй тэрбум ам.доллароор хэмжигдэж байна. Украин улсыг сэргээн босгох төлөвлөгөө 750 тэрбум ам.доллароор үнэлэгдэж байна. Хэн үүнийг төлөх юм?

Украин улсын засгийн газраас итгэж байгаагаар, сэргээн босгох төлөвлөгөөг санхүүжүүлэх гол эх үүсвэр нь Оросын олигархуудаас хураасан авсан хөрөнгө байх учиртай гэж үзэж байгаа.

Украин улсыг сэргээн босгох төлөвлөгөө нийт 3 шатлалтай байна. Эхний шатанд бид одоо ч ард иргэдийн өдөр тутмын амьдралд тулгамдаж буй усан хангамж зэрэг чухал ач холбогдол бүхий зүйлсийг засна. Дараа нь байлдаан дуусмагц түр хугацаанд оршин суух сууц, эмнэлэг, сургууль гэх мэт “түргэн сэргээх шаардлагатай” төслүүдийг хэрэгжүүлэх юм. Харин сүүлийн шат урт хугацаандаа манай улсыг өөрчлөхөд чиглэнэ” гэжээ.

Эх сурвалж: The Reuters